ಮಂಗಳೂರು: ರಾಜ್ಯಾದ್ಯಂತ ನಕಲಿ ಮಾತ್ರೆಗಳ ಮಾರಾಟ ಹಾಗೂ ಹೋಟೆಲ್ಗಳಲ್ಲಿನ ಅಶುಚಿತ್ವದ ಆಹಾರ ಪೂರೈಕೆಗೆ ಶಾಶ್ವತ ಕಡಿವಾಣ ಹಾಕಲು ಸಾರ್ವಜನಿಕರ ಸಹಭಾಗಿತ್ವದ ವಿನೂತನ ಯೋಜನೆಯನ್ನು ಜಾರಿಗೆ ತರಲಾಗುತ್ತಿದೆ. ಪ್ರತಿ ತಾಲೂಕು ವ್ಯಾಪ್ತಿಯಲ್ಲೂ ನಿವೃತ್ತ ಹಿರಿಯ ನಾಗರಿಕರನ್ನೊಳಗೊಂಡ ‘ವಾಚ್ ಟೀಮ್’ (ಕಣ್ಗಾವಲು ಸಮಿತಿ) ರಚಿಸಲು ಸರ್ಕಾರ ಗಂಭೀರ ಚಿಂತನೆ ನಡೆಸಿದೆ. ಮಂಗಳೂರಿನಲ್ಲಿ ಶನಿವಾರ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಈ ಕುರಿತು ಮಾಹಿತಿ ನೀಡಲಾಯಿತು.
ಏನಿದು ಹಿರಿಯರ ‘ವಾಚ್ ಟೀಮ್’?
ಸದಸ್ಯರ ಆಯ್ಕೆ: 60 ವರ್ಷ ದಾಟಿದ ನಿವೃತ್ತ ವೈದ್ಯರು, ಪೌಷ್ಟಿಕತಜ್ಞರು, ಕಾಲೇಜು ಪ್ರಾಧ್ಯಾಪಕರು ಹಾಗೂ ಸಮಾಜಮುಖಿ ಹಿರಿಯ ನಾಗರಿಕರನ್ನು ಈ ತಂಡಕ್ಕೆ ನಿಯೋಜಿಸಲಾಗುತ್ತದೆ.
ಅಧಿಕಾರ ಮತ್ತು ಕಾರ್ಯವೈಖರಿ: ಸ್ಥಳೀಯ ಬೇಕರಿ, ಹೋಟೆಲ್ ಹಾಗೂ ಮೆಡಿಕಲ್ ಶಾಪ್ಗಳಿಗೆ ದಿಢೀರ್ ಭೇಟಿ ನೀಡಿ ಗುಣಮಟ್ಟ ಮತ್ತು ಸ್ವಚ್ಛತೆ ಪರಿಶೀಲಿಸುವ ಹಾಗೂ ಸಂಬಂಧಪಟ್ಟ ಇಲಾಖೆಗೆ ನೇರ ವರದಿ ಸಲ್ಲಿಸುವ ಕಾನೂನಾತ್ಮಕ ಅಧಿಕಾರವನ್ನು ಈ ಸಮಿತಿಗೆ ಕಲ್ಪಿಸಲಾಗುತ್ತಿದೆ.
ಕ್ಷಣಾರ್ಧದಲ್ಲಿ ದೂರು ನೀಡಲು ‘ಕ್ಯೂಆರ್ ಕೋಡ್’ ಅಸ್ತ್ರ
ಅವಧಿ ಮೀರಿದ ಔಷಧ ಅಥವಾ ಕಳಪೆ ತಿನಿಸುಗಳ ಬಗ್ಗೆ ಗ್ರಾಹಕರು ಸ್ಥಳದಲ್ಲೇ ದೂರು ನೀಡಲು ಅನುಕೂಲವಾಗುವಂತೆ ಹೋಟೆಲ್ ಮತ್ತು ಮೆಡಿಕಲ್ ಶಾಪ್ಗಳಲ್ಲಿ ಕ್ಯೂಆರ್ ಕೋಡ್ (QR Code) ಅಳವಡಿಸಲಾಗಿದೆ. ಇದನ್ನು ಸ್ಕ್ಯಾನ್ ಮಾಡಿ ದೂರು ದಾಖಲಿಸಿದರೆ, ಆಹಾರ ಸುರಕ್ಷತೆ ಹಾಗೂ ಔಷಧ ನಿಯಂತ್ರಣ ಇಲಾಖೆಯ ಅಧಿಕಾರಿಗಳು ತಕ್ಷಣ ಸ್ಪಂದಿಸಿ ಕ್ರಮ ಕೈಗೊಳ್ಳಲಿದ್ದಾರೆ. ಈಗಾಗಲೇ ಎರಡು ದಿನಗಳಲ್ಲಿ ಬರೋಬ್ಬರಿ 400ಕ್ಕೂ ಅಧಿಕ ದೂರುಗಳು ದಾಖಲಾಗಿವೆ.
ನಕಲಿ ಔಷಧ ಜಾಲದ ಹೆಡೆಮುರಿಕಟ್ಟಲು ‘SIT’ ಅಖಾಡಕ್ಕೆ
ಹಿಮಾಚಲ ಪ್ರದೇಶ ಹಾಗೂ ತೆಲಂಗಾಣದಿಂದ ಕಳಪೆ ಔಷಧಗಳನ್ನು ತಂದು ಪ್ರತಿಷ್ಠಿತ ಬ್ರ್ಯಾಂಡ್ಗಳ ಲೇಬಲ್ ಅಂಟಿಸಿ ಮಾರಾಟ ಮಾಡುತ್ತಿರುವ ಬೃಹತ್ ದಂಧೆ ಬಯಲಾಗಿದೆ. ಐಸಿಯುನಲ್ಲಿ ಬಳಸುವ ತುರ್ತು ಜೀವ ರಕ್ಷಕ ಔಷಧಗಳೂ ಇದರಲ್ಲಿ ಸೇರಿರುವುದು ಆತಂಕ ಮೂಡಿಸಿದೆ. ಇದರ ಕಿಂಗ್ಪಿನ್ಗಳು ವಿದೇಶದಲ್ಲಿದ್ದು (ದುಬೈ), ಈ ಜಾಲವನ್ನು ಸಂಪೂರ್ಣವಾಗಿ ಮಟ್ಟಹಾಕಲು ಪೊಲೀಸ್ ಹಾಗೂ ಔಷಧ ನಿಯಂತ್ರಣ ಇಲಾಖೆಯನ್ನೊಳಗೊಂಡ ವಿಶೇಷ ತನಿಖಾ ತಂಡ (SIT) ರಚಿಸಲಾಗಿದೆ.
About The Author
